Lip-sync

前言：邊有人咁老土o架：甩髮金牌經理人，成日用「好人」去為旗下甩髮新人側田做marketing，甚麼「好人」／「好人歌集」／忽然又「我不是好人」，好咩人o者，真係低能！環顧當今演藝界，在娛樂記者炒作下，似乎係好人冇幾多，撚人一籮籮；夾硬去「撐好人」，肉麻到爆，簡直是自取其柒。

入正題：最近市面另一甩髮歌手、喜劇敗類鄭中基，演出的新片《至尊無賴》推出了Teaser，戲院也有播放，林子聰與鄭中基以「稻中式」造型，咪嘴演繹「犀照明」（徐小明）的首本名曲《青春痘》，你話好唔好笑先？

我想，至少導演陳嘉上和編劇陳慶嘉會知道笑位在哪裏吧？

二人的「咪嘴」演出方式，也就是Lip-sync MV，在網上流行好一段日子了，編導曉得借用這種format去做Teaser，都算有一點小聰明（只能算是挪用吧，話佢抄又未免太過無賴：實在預告Teaser入面那首《青春痘》，也是用鏡頭推入電腦屏幕才開始演唱的）。

大概因為在American Idol的影響，加上Web Cam與Google Video的力量，好多外國白痴仔女，都製作了獨家MTV放上網任人欣賞，其中一對荷蘭靚妹Pomme & Kelly因為演出夠癲，己成為不少人的模仿對象。

在Google Idol還有大量Lip-sync作品，睇極仲有，其中選唱九十年代老土Boy Band Pop Song的，更是白痴極品。

印象中，韓國日本台灣都有這一類Web Video，看過了，反而香港，如果有，一定被網民笑到面懵懵，以後唔使上網都得。於是，弱智的行為，就由鄭中基代勞。

最近《至尊無賴》也開始發相片給傳媒做宣傳，根據劇照和資料，見到鄭中基再次扮智障、扮女人、索校服裙，還有就是扮失憶、扮臥底、扮乞衣、講港式英文，都是再三重覆前作的演繹，又o黎呢幾招？唔係掛？希望這只是早期宣傳的垃圾資料吧。

網站上，電影預告片02還有一句「懶係o野」的字幕，向觀眾提問：「你上次開懷大笑係幾時？」嘩，邊有人咁問法，咁老土o架？！

上次係幾時，真係唔記得；但如果下次開懷大笑，係因為見到鄭中基又扮女人的話，咁作為香港觀眾，就真係可悲到極點咯！

其實喜歡片子的英文名：Under Cover Hidden Dragon，暗食《臥虎藏龍》的英文片名；還有網站上的主角造型，亦很有日本漫畫風格（正確說應是鳥山明Feel），包裝做到足，但如果入面還是換湯不換藥，就認真冇得救了。